2024 yil 7 avgust, Samarqand. Samarqand xalqaro aeroporti yo‘lovchi oqimining sezilarli o‘sishini namoyish etishda davom etmoqda va Yevropaning ACI Europe tashkiloti tomonidan e’lon qilingan 2024-yilning birinchi yarim yilligi natijalariga ko‘ra, Samarqand havo porti o‘rta aeroportlar toifasida ikkinchi o‘rinni egalladi.
Joriy yilning birinchi yarmida yo‘lovchi tashish hajmi pandemiyadan oldingi 2019 yilga nisbatan 191,6 foizga oshdi. Bu ko‘rsatkich yiliga 1 milliondan 10 milliongacha yo‘lovchi tashiydigan aeroportlar toifasi orasida ikkinchi o‘rinda turadi.
Samarqand aeroporti 2022-yil oktyabr oyidan boshlab ketma-ket 22-oy davomida barqaror o‘sishni ko‘rsatmoqda. 2024-yilning iyul oyida yo‘lovchi tashish hajmi 117 ming kishiga yetdi, bu 2023-yilning iyul oyiga nisbatan 51%ga yuqori.
2024-yilning birinchi olti oyida aeroportdan rekord darajadagi yo‘lovchilar - 647 ming yo‘lovchi o‘tgan, bu 2023-yilning shu davriga nisbatan 47 foizga ko‘pdir.
Ushbu natija yo‘lovchilarga yuqori sifatli xizmat ko‘rsatish va qulaylikni ta’minlagan holda doimiy ravishda yaxshilanayotgan Samarqand xalqaro aeroportining barqaror o‘sishi va rivojlanishini ta’kidlaydi.
Ayni paytda Samarqand xalqaro aeroportining yangi terminalini boshqaruvchi Air Marakanda kompaniyasi 21 ta aviakompaniya bilan hamkorlik qilmoqda. Parvozlar 18 ta yo‘nalish bo‘yicha amalga oshiriladi, ulardan 17 tasi xalqaro, 1 tasi ichki yo‘nalishdir.
