2025-yil 17-noyabr, Samarqand. Samarqand xalqaro aeroporti 2025-yil 30-oktabrdan 13-noyabrgacha o‘tkazilgan YUNESKOning 43-Bosh konferensiyasi ishtirokchilarini qabul qilish va kuzatib qo‘yish bo‘yicha asosiy logistika markazlaridan biri bo‘ldi.
Tadbir davomida Samarqand xalqaro aeroporti 2 000 dan ortiq YUNESKO delegatlari va mehmonlarini qabul qildi va ularning jo‘nab ketishini ta’minladi. Delegatlar muntazam xalqaro aviareyslar orqali, shuningdek, Parij – Samarqand – Parij yo‘nalishidagi to‘g‘ridan-to‘g‘ri charter reyslari hamda bir qator boshqa maxsus charter parvozlari orqali tashrif buyurdilar.
Tadbirga tayyorgarlik jarayonida aeroportning operatsion imkoniyatlari kengaytirildi: pasport va bojxona nazorati postlarining o‘tkazuvchanligi oshirildi, delegatsiyalar uchun alohida ro‘yxatdan o‘tkazish racklari tashkil etildi, aeroport va konferensiya maydonlari o‘rtasida maxsus transfer yo‘nalishlari joriy etildi, shuningdek rasmiy delegatsiyalar uchun kuzatuv xizmati yo‘lga qo‘yildi. Ushbu choralar kechikishlarning oldini olishga va ishtirokchilarning uzluksiz hamda qulay harakatlanishini ta’minlashga xizmat qildi. Xorijiy mehmonlarga yuqori darajada xizmat ko‘rsatish maqsadida terminalda 50 nafardan ortiq ko‘ngilli hamda qo‘shimcha xizmat ko‘rsatish guruhlari faoliyat yuritdi.
YUNESKOning 43-Bosh konferensiyasining Samarqandda o‘tkazilishi mintaqaning yuksak darajadagi xalqaro tadbirlarni qabul qilishga tayyorligini yana bir bor tasdiqladi va O‘zbekistonning madaniy hamda ilmiy muloqot markazi sifatidagi nufuzini mustahkamladi. Aeroport va tegishli idoralar o‘rtasidagi muvofiqlashtirilgan ish jarayonlari tadbir davomida yuqori xavfsizlik talablari va oshirilgan operatsion yuklama sharoitida ham barqaror logistika va sifatli xizmat ko‘rsatishni ta’minladi.
Qo‘shimcha ma’lumot:
AIR MARAKANDA — O‘zbekiston aviatsiya sohasida davlat-xususiy sheriklik asosida amalga oshirilgan birinchi loyiha doirasida Samarqand xalqaro aeroportining yangi terminaliga yer usti xizmatlari va boshqaruvni amalga oshiruvchi operator kompaniya. Uchinchi yildirki, Samarqand xalqaro aeroportining yangi terminali World Airport Awards (SKYTRAX) xalqaro reytingida Markaziy Osiyo bo‘yicha yetakchi o‘nlikdan o‘rin egallab kelmoqda.2024-yil yakunlariga ko‘ra, aeroport ACI EUROPE reytingida o‘z toifasida yo‘lovchi oqimi o‘sish sur’ati bo‘yicha 2-o‘rinni egalladi.
AIR MARAKANDA Matbuot xizmati
Tel.: +998 97 907 8767
Email: pr@airmarakanda.com
Sayt: samarkandairport.com
